چل رھن دے

چل رھن دے

تحریر محمد اظہر حفیظ

کی لکھاں، چل رھن دے، دکھ لکھنے ھوون تے یا فر گالاں کڈھنیاں ھوون بندہ مڑ ماں بولی تے آن کھلوندا اے، بگانی بولی وچ کہنا اوکھا ھوجاندا اے، تے ماں واں دے دکھ وی ماں بولی وچ ھی لکھے جا سکدے نے ، اسی اننے جگ نال پیار کرنے والے نئی جننے لوکی بار رھن والے جگ نال پیار کردے نے، بڑے بڑے دعوے نے انناں دے اپنے جگ بارے وچ، فرانس تو ٹردیاں اس نمانی نے دسیا ھوئے گا اپنے بالاں نو کاکا پاکستان دی دھرتی ساڈی ماں اے تسی ویکھناں تہانوں کڈی عزت ملدی اے، تہانوں میرا جگ اینج گود وچ چھپا لے گا جس طرح ماں اپنے بچے چھپاندی اے، تسی ویکھناں تے سہی، میرا جگ ھن بدل گیا اے بلکل نوا نکور بن گیا اے تے ناں وی نوا پاکستان ھوگیا اے، سب اس وچ اینج رھندے نے جس طرح ریاست مدینہ وچ رھندے نے، ھر طرف قانون دا راج اے، کی کی دسیا سی اس نے اپنے بالاں نوں، فر بالاں سامنے ھی تار تار ھوئی اس دے بالاں دی ماں دی عزت، میرے ھن کئی دکھ نے، جنناں میری روح نوں چھلنی بنا چھڈیا اے، سمجھ نہیں آندی پئی عزت میرے بالاں دی ماں دی لٹی گئی اے کہ میری دھرتی ماں دی، میری تے عزت وی لٹ گئی تے میرا دیس وی لٹ گیا اینج لگدا اے میں فرانس تو نہیں ھندوستان تو ھجرت کرکے آئی آں تے میری عزت دشمناں نے پامال کردیتی اے، شاید اس دا دکھ کجھ کم ھوندا پر میں کس نوں اپنا دکھ سناواں، میرے اپنے لوکاں میری عزت میرے بالاں سامنےاس طرح لٹی اے جس طرح ھجرت ویلے ساڈیاں کئی ماواں تے پہناں نال ھویا سی، کدی تے خیال آندا اے شاید اسی نوے پاکستان ول ھجرت کر رھے ھاں تے اس طرح دے واقعات ھورھے نے، پر میری تے عزت وی گئی تے جگ وی گیا میں مڑ ایتھے کس دعوے تے آنا اے تے اپنے بالاں نوں کی لارا لانا اے چلو آو اوتھے چلیے جتھے تہاڈی ماں دی عزت تہاڈے سامنے تار تار ھوئی سی، سب تو وڈا پنجاب دا چوکیدار کہندا اے غلطی میری اے، میں غلط وقت تے بالاں نال نکلی، سہی کہندا اے، غلطی ساری ساڈی ھی اے، ویلا وی ساڈا ھی غلط سی، عزت وی ساڈی ھی لٹی گئی، سزا وی سانوں ھی دے دیو جے کوئی رہ گئی اے تے، زرا ویکھ لینا جس پولیس نوں میں مدد واسطے کال کیتی سی بندے وی انناں نے ھی تے نہیں بھیج چھڈے، ذرا سوچنا جس جگہ میری گڈی دا پیٹرول مکیا سی، ڈاکو اس جگہ تک کس طرح آئے، تے اننی چھیتی کس طرح آئے، ڈیوٹی والیاں دے فون دا ریکارڈ ویکھ لو امید اے سب پھڑے جان گے، فر عدالت تے یقین رکھو او سب نوں چھڈ دے گی جس طرح سانحہ ساھیوال والے، کوئٹہ والے، مینوں تے اے سمجھ نہیں آندی جدوں جرم کرن دی کوئی چھٹی نہیں ھوندی تے فر ججاں تے عدالتاں دیاں چھٹیاں کیوں ھوندیاں نے، لائسنس والا اسلحہ لیکر چلن تے پابندی اے، تے فر بغیر لائسنس والا ڈاکو چور کداں لئی پھردے نے، ذمہ دار کون اے، گلاں تے ھور وی بڑیاں نے، چل رھن دے،
 
 

 

Prev جونک

Leave a comment

You can enable/disable right clicking from Theme Options and customize this message too.