ناٹک
کردار محمد اظہر حفیظ

آو آج اپنی گلی وچ چھڑکاؤ کرکے ناٹک کریئے۔ پتہ نہیں اس دی اجازت ھے وی یا نہیں۔ کیتے اک سو چوالیس تے نافذ نہیں ھوئی ۔ تسی تیاری کرو میں حاکماں نوں پچھ کے آنا واں۔
ایک پتر لکھ لواں صاحباں دے ناں۔ 
صاب بہادر اسی اپنے محلے وچ ایک ناٹک کرن لگے آں سانوں اجازت دیتی جاوے۔ چھٹی دے نال اس دی کہانی وی جوڑی ھوئی اے، کوئی اوچی گل نہیں کیتی، نا فوج دا ذکر اے نا ھی گورے صاب بہادر دا تے نہ ھی سچے لیڈراں دا۔ اے تے کہانی اے اک پیو دی جیدیاں چار دھیاں رانیاں نے تے اک و اک بڈھی۔ او مزدوری کردا اے تے اپنے بال بچے پالدا اے۔ چاروں دھی رانیاں پیو نوں بادشاہ سلامت سمجھدیاں نے تے انناں دی سادی جئی ماں اس نوں مجازی خدا سمجھدی اے۔
اوناں پانجاں بھولیاں نوں نہیں پتہ کہ نہ ھی اور بادشاہ اے تے نہ ھی مجازی خدا۔
پر او انناں پنجاں دے حکم دی بجا آوری انج کردا اے جیداں پنج وقتی نمازاں سب وقتوں وقت، سب باجماعت کوئی قضا نئیں۔ اونناں نوں پڑھاندا وی اے تے نال نال جہیز وی بنادا اے۔کلیاں بہ کے انناں دے وچھڑ جان دے دکھ تو روندا وی بہت اے۔ ساڈا چڑیاں دا چنبہ اے بابل اساں اڑ جانا گاندا جاندا اے تے روندا جاندا اے۔
اووی ھر دھی رانی دی طرح اس نوں گلے لاندیاں نے تے جھوٹی تسلیاں دیندیاں نے وے بابلا ویلا بدل گیا اے اساں چھڈ کے جان والیاں نئیں۔ سدا تیرے نال نال۔ نہ نہ میری سوھنی دھی رانی سدا ناں رب دا میرا پتر کفر نہیں بولی دا سوھنے رب توں ڈرو تے تیاری کرو ۔ وے بابلا ہجے تے امتحان مکے نے۔ نہ میری دھی رانی اپنے اپنے گھر جان دی تیاری کرو۔ اسی کلے ٹھیک آں۔ کر لواں گے گزارا۔ پر بابلا تو تے بےبے ھر ویلے لڑدے رھنے او نہ پتر نہ ساڈا بہت گوڑا پیار اے تے تسی چاروں رانیاں اس پیار دیاں نشانیاں اسی تے تہانوں دکھاون واسطے لڑدے آں تہانوں پتہ لگدا رھوے کہ جیندے نے۔ بھلا پتر کدی کلا جی وی کدی کسے نال لڑیا۔
پر بابلا تسی تے بےبے دو جینے او نئیں پتر تہاڈے جان تو بعد تے اسی کلے ھی رہ جاواں گے۔ ٹبر تے اولاد نال ھوندا اے بڈی بندا تے کلے ھی ھوندے نیں۔
تسی اچی اچی سورہ یاسین کیوں پڑھدے ھو تہاڈی بےبے نال میرا وعدہ اے پہلے تہانوں ٹوراں گے تے فر جاواں گا۔
بابلا ویلا ھی ٹور جاندا اے ویکھو پہلے کون ۔
ماپیاں دے جنازیاں دیاں وارث تے دھیاں ھی ھوندیاں نے ۔ پتر نئیں۔ تسی دونوں تے بڑے خوش قسمت او جنازے دو تے وارث چارچار۔