ھن دل نئیں کردا - Muhammad Azhar Hafeez

ھن دل نئیں کردا

تحریر محمد اظہر حفیظ

پہلے پہل دل کجھ نہ کجھ کردا رھندا سی، کدی تیز دھڑکدا سی کدی ھولی ھولی، کدی فوٹو کھچدا سی تے کدی لکھن بہ جاندا سی، کئی واری تے اینج وی ھویا، دل دل دل کرن لگ پیا، کدی دل پیار کرن لگ پیندا سی تے کدی نفرت، کدی دل سفر تے نکل جاندا سی تے کدی دل کیتے بہ ھی جاندا سی تے مینوں وی دل بیٹھیا بیٹھیا محسوس ھون لگ پیندا سی دل وی تے جاندار اے تھک جاندا ھونا وچارا، کدوں تک سارے کم اے کلا ھی کرے، کدی دل ھسن لگ پیندا سی تے کدی ھسدیاں ھسدیاں رون لگ پیندا سی، دل وی رب نے عجیب مخلوق بنائی اے کدی تہاڈا دل تہاڈے کول ھوندا اے تے کدی کسے ھور دے کول، جد کوئی آکھدا اے ھائے میں مر گیا تے اونے مرنا ای اے جسدا دل کسے ھور کول ھووے تے اودا جین نال کی کم، بڑے بڑے مر دے ویکھے تے بچیا کوئی وی نئیں، تے سارے ھی مر گئے، دل استعمال جو غلط کیتا، کسے دے دل وچ سوراخ اے تے کسے دا دل وڈا اے، کچھ تے بہت ھی جھلے لوگ نے جدوں دل چلن تو انکاری ھوجاندا اے تے اس وچ چھلے پواندے نے کہ دل دا راہ صاف ھوجاوے، جھلے نا ھون کسے تھاں دے کدی دل دے راہ وی صاف ھوئے نے تے جے دل بلکل وسوں باھر ھوجاوے تے دل نوں کھول کے آپریشن کروا کے صاف کران دی کوشش کردے نے پر کدی اینج وی دل وچوں کدورتاں نکلیاں نے، دل تے اودا ھی صاف اے جس دل نوں صاف رکھیا تے اس وچ رب نوں آباد کیتا، شاعر اویں تے نئیں کہندا، ایویں نہ جھلیئے ویلی بو اللہ اللہ کردی رو ،

میرے نال ایک عجیب حادثہ ھوگیا اے کجھ سمجھ نئیں آندی پئی، کہ میں تے زندہ واں پر دل مر گیا اے، ھن کجھ وہ کرن نوں نئیں کردا، نہ فوٹو کھچدا واں، نہ گلاں کردا واں، نہ سفر کردا واں، نہ محبت کردا واں، تے نہ ھی نفرت کردا واں، بڑے ھی دن ھوگئے اپنے آپ نال وی کدھی دل لگی نئیں کیتی، دل نہ اداس ھوندا اے تے نہ خوش ھوندا اے لگدا اے بے حس جیا ھوگیا اے، دل تے کئی واری سر رکھ کے سنن دی کوشش کردا واں کہ کوئی آواز وی آندی اے کہ نئیں، پہلے تے بڑا دھک دھک دھک دھک کردا سی ھن نمانا چپ اے، جیداں کوئی بچہ ڈر کے سہم نہیں جاندا، شاید سہم گیا اے اس دا ڈر لان دا میرے کول تے کوئی علاج نئیں بس اس نوں اس دے حال تے چھڈ چھڈیا اے، کسے نوں دسدا وی نئیں کیتے کھلوا کے دیکھن لگ گئے، تے سب کچھ ویکھ ھی نہ لین تے حیران ھوجاون کہ اس دل وچ تے کئی جہاں وسدے سن ھن ویران تے حیران اے، اس واسطے اس نوں اسدے حال تے چھڈ دتہ اے، میں تے کدھی اودا حال وی نئیں پوچھدا بلکل انجان بن گیا واں جسطرح اس دل نوں میں جان دا ای نئیں، سچی گل دساں میں دل نوں سائلنٹ موڈ تے لا دتہ اے، نہ آواز تے نہ کپکپاھٹ، ھن دل کجھ نہیں کردا

azhar November 25, 2020

Blogs