تیری یاد ستاندی

تیری یاد ستاندی

تحریر محمد اظہر حفیظ

میرے لعل اٹھ جا۔ دیر ہوجانی اے۔ تو اسطرح دے کم کیوں کردا ایں جیڑے تیرے ابا جی ناراض ہوندے نے۔ میں تے کئی واری آکھیا۔ برے نوں نہیں برے دی ماں نوں ماروں۔ پر اوسُندے ہی نہیں تیرے کم جو اسطرح دے نے۔ میری ماں میرے لیے صبح صبح ول والے پراٹھے تےسموسہ آملیٹ بناندی سی مینوں بڑا پسند سی۔ کدی روٹی وچ چینی تے دیسی گھی پاکے چوری بنا دینی تے کسی دودھ وچ سویاں پاکے تے اوتے دیسی گھی پاکے دینا۔ اس دی بھینی بھینی خوشبو مینوں آج وی یاد اے۔ دوپہر نوں لائلپور دی گرمی وچ میری جنتی ماں نے سکولوں پڑھا کے آنا تے سانوں باداماں دی سردائی بناکے پلانی۔ کدی بیسن دی مٹھائی بنا دینی تے کدی السی دیاں پِنیاں بنادیناں، تے کدی سوجی دا حلوہ بنا دینا ۔ اسی سفید پوش درمیانے طبقے دے لوگ ساں پر ساڈے ماں باپ ہوراں سانوں بہن بھائیاں نوں شہزادے تے شہزادیاں طرح پالیا۔ سانوں نہیں یاد کدی کسی چیز،دی کمی ہون دیتی ہوے۔ میرے ماں باپ ورگے ماں باپ کم لوگوں کو نصیب ہوئے۔ میں خوش قسمت سی جیڑا انناں دے گھر وچ پیدا ہویا اے وی رب دا کرم ای اے۔ ورنہ میں کی کرسکدا سی۔ روزانہ نہا کے کنگی کر کے سکول جانا۔ جوتی پالش، کپڑے استری، سکول ٹیچر ساڈیاں مثالاں دیندے سن کہ ماں باپ نوکری کردے نے پر بچے ہمیشہ صاف ستھرے۔

ہر لمحے مینوں میرے والدین دی یاد ستاندی اے۔ میری بہن بھرا بیوی بچے سب بہت اچھے نے۔ پر انناں دی یاد دل دماغ وچوں نہیں جاندی۔ جدوں وی زندگی وچ کجھ بہتری آئی انناں دیاں دعاواں دے صدقے تے رب دے فضل نال آئی تے اور جدوں وی نقصان کیتا اپنے برے کموں کیتا۔

میری کوشش تے ہے کہ میں اپنے ماں باپ دی طرح اپنے نال وابستہ ہر رشتے دی اسی طرح لاج رکھاں خدمت کراں جس طرح او کردے سن پر اے میرے واسطے ممکن نہیں شاید میں اِنناں اچھا انسان نہیں۔

میری ذات نوں جدوں وی دکھ پہنچ دا اے تے میں رب دی ذات اگے روون لگ پیناں واں یا باری تعالی میں تے اینج کدی وی نہیں کیتا۔ میرے نال کیوں ہو رہیا اے۔ میری تے ساری زندگی دی جمع پونجی وی چند آنسو ہی نے جیڑے اکثر فضول خرچ ہوجاندے نے۔ اننے میں جمع نہیں کرسکیا جننے خرچ کردیتے نے۔ میرے ماں باپ میری ہر خواہش پوری کیتی ہن مینوں چپ لگ گئی اے کہ اولاد دی ہر خواہش پوری کرنا کننا مشکل کم اے۔ میریاں کاکیاں ہر روز نوی تو نویاں خواہشاں کردیاں نے۔ کدھی اونٹ دا بچہ لینا اے تے کدی شیر دا بچہ تے کدی بلی دا بچہ، جیڑی شئے ویکھدیاں نے کھلونا سمجھ کے منگن لگ پیندیاں نے بابا یہ لے دیں۔ فر ذھن وچ آندا اے ہر دھی رانی دا باپ جو وی ہوے او بادشاہ ہی سمجھدی اے۔ باپ اس بادشاہی وچ روز جیوندا تے مردا اے۔ اس سال فر روزے آئے نے مینوں روزے رکھن دی اجازت نئیں۔ صحت دی وجہ توں۔ نہ روزیاں وچ امی ابو یاد آئے تے نہ ہی عید تے یاد آن گے کیونکہ عید تے روزے داراں دی ہوندی اے۔ تے میں کینوں یاد کرنا۔ میرا دل تے کردا اے ول والا پراٹھا ہووے، آملیٹ ہووے تے دہی تے کھلی چینی پاکے کھاواں تے ابا جی دی آواز آ وے صاحب ہر گل دا کوئی طریقہ ہوندا اے کم چینی پایا،کر تیرے ماں باپ نوں شوگر اے۔ کی دساں انناں نوں شوگر وی ہوگئی اے۔ اب نہ پراٹھا ہے، نہ آملیٹ ہی، نہ ہی دہی ہے جس پر کھلی چینی ڈالی جاسکے اور نہ دستر خوان پر ساتھ والدین ہیں جو روک ٹوک کر سکیں۔ اس لیے روزے نہ رکھنے کا بھی احساس نہیں ہوتا ہے ۔ افطاری روانہ وقت پر کرتا ہوں میں بلکل بھی تو کافر نہیں ہوں نہ جی۔ روزہ کھولنے کی دعا پڑھتا ہوں اور کھجور کھا لیتاہوں۔ کبھی کبھی بد پرھیزی بھی کرلیتاہوں۔ ماں باپ جو نہیں ہیں۔

کجھ گلاں نے جیڑیاں ماں باپ نال ہی ہوسکدیاں نے۔ تے ماں باپ نوں ہی آواز دیتی جاسکدی اے۔ ہن چپ جئی لگ گئی اے تے سارے کہندے نے کی گل اے چپ چپ کیوں رہندے او ہن کی جواب دیاں کہ کجھ گلاں تے درد صرف ماں نوں دسے جاسکدے نے ہور کسے نوں نہیں ۔

مائیں نی میں کینوں آکھاں

درد وچھوڑے دا حال نی

Prev سیاست
Next دارالحکومت

Comments are closed.